مريت بذي المرحلة ؟!؟

الســــلام علــــيكم

وشآخر الأخبار يا البــــدو >>> استهبال × استهبال كالعادة كما عهدتكم ههههههه

:::. بالنسبة للشباب :::.

أبغيك تجاوب هل مريت بذي المرحلة

::. مرحلة الطفولة ::.
-انت مب ولدنا لاقينك بالشارع ... سؤال تكرر عليك من الي اكبر منك
- لا دخلت الديوانية مع ابوك و قعد جنبك رجال سألك " من تحب أكثر أمك ولا أبوك " ؟؟
- مرة ضعت بالسوق و لاحظت امك من بعيد كانت تبكي ولما جيت تبغي تحضنها شفت لك كف جايك ؟

::. مرحلة المراهقة ::.
- سرقت مفتاح السيارة من ابوك ؟ و لا سقت دائماً مسرع وماوراك ولاااااا شي
-لازم تهاوش في اي لعبه جماعيه مع اخوياك سواء كانت " كيرم " الى " بلوت " مروراً بـ " بلاي ستيشن " و " الكرة " ما اسلمت منكم
-لا مريت بقالة ولا مطعم ولا شفت هندي بالشارع ناديته " محمد "
- لا هايطت قدام اعيال صفك يقولون لك ( فلان تصير صديقي ؟؟ )
- لا لعبت انت و اخوياك بالشارع اول ما تشوف سيارة تشوتها بنعالك عشان تدوسها السيارة ؟

::.مرحلة الثانوية و الجامعة ::.
- ما تذاكر الا ليلة الاختبار ههه تذاكر خير ان شا الله قصدي تبرشم الا ليلة الاختبار
-امك و ابوك الأوائل بالمدرسة دوووم و ما فيه اذكى منهم ... سؤال بس انت على من طالع وين ذكاء ابوك في البراشيم و حفظ امك للكتاب ؟؟
- لا طلعت مع اخوياك للبر صرت عريجي و راعي هياط و نمر بن عدوان و خشير الذيب << على فكرة ترى الذيب ما يهرول عبث ههه
-مواصفات البنت الي بتزوجها بيضا حلوة مزيونة العيون الوساع و الشعر اسود طويل و حرير و طويلة و تعرف لكل شي
- لا حبيت تفتح موضوع مع ولد جنبك ... تدرس ؟ سنة كم ؟ ما شا الله سقطت بكم مرحلة ؟عندك سيارة ؟ اي موديل ؟

::. مرحلة الرشد ( بعد الزواج ) ::.
- تزوجت بنت عمك و هي عكس البنت الي تبغيها ؟
- اول ما تدق عليك زوجتك اول سؤال تسألك اياه ( وينك ؟ ) ترد انت بهدوء لان الرجاجيل يمك ( قريّب )
- لا اتصلت عليك ام الاعيال ترد عليها كنها رئيسك بالعمل ولا واحد من الرجاجيل
-لا طلعت اهلك اول شي تقوله لهم ( فشلتونا ) لو توكم ما ركبتم السيارة ههه
- السمك ما ينطبخ الا يوم الجمعة بالبيت
- اول ورع باسم ابوك و ثاني ورع باسم ابوها و اول بنت باسم امك و ثاني بنت باسم امها وصرتوا لا تجمعتوا قلتوا فلانة بنت فلان ولا فلان ولد فلان
- لا رحت تجيب ام الاعيال من بيت اهلها تدق عليها وتقولها ( اطلعي انا عند الباب ) و انت باقي لك قرن عشان توصل

::. بالنسبة للبنات ::.

::. مرحلة الطفولة ::.
- يا كثر ما لعبتي ( حريم ) مع بنات العايلة و دائماً تمثلين دور البنت المخطوبة ولا البنت الكبيرة المتزوجة
-تحفظين آياتك و آيات أخوك من كثر ما امك تكررها على اخوك الدلخ حفظتيها
- تحلمين دائماً بدور سندريلا و تستنين الأمير
- اوقات لما تشترون كتكوت ولا سمكة ولا اي حيوان كان, تتخيلين ان الساحرة سحرته و هو بالأصل أمير و تهتمين فيه عشان يحبك لا رد انسان

::. مرحلة المراهقة ::.
- تحبين يطرون اسمك مع اسم الحريم ؟
- تلصقين في مجلس الحريم و تموتين على سوالفهم و تشربين القهوة معهم
- كل ما قالوا لك شيء قلتي لهم ( انا كبيرة ) كنك منتي مصدقة
- حلمك تشتري علبة مكياج و تفنين بالمكياج عشان تسدي النقص الي فيك
- توبيكاتك ( أنا دلوعة ابوي ولا امي ) و آخرتها داخلين بكف و طالعين بكف
- تحلمين بقصة حب خيالية

::. مرحلة الثانوية و الجامعة ::.
- تتزينين و كل يوم رايحة للكوافيرة\ الصالونة تعدلين بالأخطاء السبعة
- تنقهرين يوم خويتك تشتري شنطة مهي ماركة وسعرها اقل و انتي شارية الماركة و آخــر شي ما يكون الاختلاف الا في الخامة الي داخل
- لا رجعتي من عزيمة ( انا ازين وحدة ) ( انا اكشخ وحدة ) ( انا الوحيدة الي ... ) ( انا اول ما دخلت ... ) ( انا لما .... )
- لا رجعتي من عرس تركضين عند امك وتقولين فلانة كانت تطالع فيني .. احس بضيقة ... احس اني بستفرغ \ بزوع ... ما احس برجلي ..مادري وشفيني

::. مرحلة الرشد ( ما بعد الزواج ) ::.
- تتمنين لو زوجك كان ويليام على العرس الي سواه لكايتي
- تتمنين لو زوجك يعبرك و لو شوي و يخلي التلفزيون عنه
- تعرفين كل الطبخات بعد ما عرفتي ( ان الطريق لقلب الرجل معدته )
- تكرهين رمضان بسبب فوازير \ مسابقات \ برامج حليمة بولند و غيرها
- بعد هواش استمر نص ساعة بينك و بين اعيالك تبغين تختمينها تقولين ( العن ابوكم ) ( مالت عليكم و على ابوكم )
- كله عندك الناس حاسدينك ... على الوسيم الي عندك ولا على قصرك يا مرأة عزيز مصر و لا على جمالك يا انجلينا ولا على ذكاء اعيالك اعيال آينشتاين ؟؟؟
- لا دخلوا خوات زوجك بمناسبة ولا شي او صديقاتك او اي حرمة كانت تناقزين انتي و اختك ( اروح اسلم عليها ) ( لا خليها هي تجي تسلم ) ( اقوم لها ) ( تخسي اصغر مني )
- لا تكلموا قدامك تبتسمين و تضحكين اول ما تركبين مع زوجك تنفجرين ( والله عاد كنت ماني ناوية اخليها تعدي ) ( والله لو تشوفها عيني ) ( والله و الله.... ) ... ترا الحرمة كانت قبل اشوي قدامك وينك من زمـــان ؟؟؟

( بالنسبة لمرحلة الزواج اذا ما كنت متزوج ماله داعي تكتب )
اذا مريت بذي المرحلة سواء شباب ولا بنات فأؤكد لكم انتوا صدق عــــرب و صدق بــــدو

أخط لكم حيـــاتـــي قبـــل تحــيـــاتــــي